ਬਰਤਾਨੀਆ ਦੇ ਟੈਕਸਦਾਤਾਵਾਂ ਨਾਲ £53 ਮਿਲੀਅਨ (5.3 ਕਰੋੜ ਪੌਂਡ) ਦੀ ਧੋਖਾਧੜੀ ਕਰਨ ਵਾਲੇ ਬੁਲਗਾਰੀਆਈ ਗਿਰੋਹ ਦੇ ਤਿੰਨ ਮੈਂਬਰਾਂ ਨੂੰ ਬ੍ਰਿਟੇਨ ਤੋਂ ਡਿਪੋਰਟ ਕਰ ਦਿੱਤਾ ਗਿਆ ਹੈ।
ਰਿਪੋਰਟਾਂ ਮੁਤਾਬਕ, ਗਾਲੀਨਾ ਨਿਕੋਲੋਵਾ, ਸਟੋਯਾਨ ਸਟੋਯਾਨੋਵ ਅਤੇ ਪੈਟ੍ਰਿਤਸੀਆ ਪਾਨੇਵਾ ਨੂੰ ਡਿਪੋਰਟ ਕੀਤਾ ਗਿਆ ਹੈ।
ਜਾਂਚ ਦੌਰਾਨ ਸਾਹਮਣੇ ਆਇਆ ਕਿ ਇਸ ਗਿਰੋਹ ਨੇ ਫਰਜ਼ੀ ਪਛਾਣਾਂ, ਜਾਅਲੀ ਤਨਖਾਹ ਦੀਆਂ ਪਰਚੀਆਂ, ਕਿਰਾਏ ਦੇ ਸਮਝੌਤਿਆਂ ਅਤੇ ਹੋਰ ਨਕਲੀ ਦਸਤਾਵੇਜ਼ਾਂ ਦੀ ਮਦਦ ਨਾਲ ਹਜ਼ਾਰਾਂ ਯੂਨੀਵਰਸਲ ਕ੍ਰੈਡਿਟ (Universal Credit) ਦੇ ਫਰਜ਼ੀ ਦਾਅਵੇ ਕੀਤੇ।
ਲਗਜ਼ਰੀ ਕਾਰਾਂ ਅਤੇ ਮਹਿੰਗੀਆਂ ਘੜੀਆਂ 'ਤੇ ਉਡਾਇਆ ਠੱਗੀ ਦਾ ਪੈਸਾ
ਇਸ ਧੋਖਾਧੜੀ ਰਾਹੀਂ ਇਕੱਠੀ ਕੀਤੀ ਗਈ ਰਕਮ ਨਾਲ ਗਿਰੋਹ ਦੇ ਮੈਂਬਰਾਂ ਨੇ ਮਹਿੰਗੀਆਂ ਕਾਰਾਂ, ਡਿਜ਼ਾਈਨਰ ਕੱਪੜੇ ਅਤੇ ਲਗਜ਼ਰੀ ਘੜੀਆਂ ਖਰੀਦੀਆਂ। ਇਹ ਧੋਖਾਧੜੀ ਕਰੀਬ ਸਾਢੇ ਚਾਰ ਸਾਲ ਤੱਕ ਚੱਲਦੀ ਰਹੀ।
ਇਸ ਮਾਮਲੇ ਵਿੱਚ ਪੰਜ ਬੁਲਗਾਰੀਆਈ ਨਾਗਰਿਕਾਂ ਨੂੰ ਜੇਲ੍ਹ ਦੀ ਸਜ਼ਾ ਸੁਣਾਈ ਗਈ ਸੀ। ਬਾਕੀ ਦੋ ਮੈਂਬਰਾਂ ਖ਼ਿਲਾਫ਼ ਵੀ ਡਿਪੋਰਟੇਸ਼ਨ ਦੀ ਕਾਰਵਾਈ ਜਾਰੀ ਹੋਣ ਦੀ ਰਿਪੋਰਟ ਹੈ।
ਇਹ ਮਾਮਲਾ ਬ੍ਰਿਟੇਨ ਦੇ ਇਤਿਹਾਸ ਵਿੱਚ ਸਭ ਤੋਂ ਵੱਡੇ ਬੈਨੀਫਿਟ ਧੋਖਾਧੜੀ ਮਾਮਲਿਆਂ ਵਿੱਚੋਂ ਇੱਕ ਮੰਨਿਆ ਜਾਂਦਾ ਹੈ।