ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ)
ਨਸ਼ਿਆਂ ਦੀ ਸਪਲਾਈ ਤੋਂ ਹੋਣ ਵਾਲੀ ਕਮਾਈ ਦਾ ਸੋਸ਼ਲ ਮੀਡੀਆ 'ਤੇ ਖੁੱਲ੍ਹੇਆਮ ਦਿਖਾਵਾ ਕਰਨ ਵਾਲੇ ਗਲਾਸਗੋ ਦੇ ਛੇ ਨਸ਼ਾ ਤਸਕਰਾਂ ਨੂੰ ਕੁੱਲ ਕਰੀਬ 45 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਗਲਾਸਗੋ ਵਸਦੇ ਪੰਜਾਬੀ ਭਾਈਚਾਰੇ ਲਈ ਨਾਮੋਸ਼ੀ ਵਾਲੀ ਗੱਲ ਹੈ ਕਿ ਇਹਨਾਂ ਨਸ਼ਾ ਤਸਕਰਾਂ ਵਿੱਚ ਇੱਕ ਪੰਜਾਬੀ ਨੌਜਵਾਨ ਅਜੈਦੀਪ ਸਿੰਘ ਦਾ ਨਾਮ ਵੀ ਸਾਹਮਣੇ ਆਇਆ ਹੈ।
ਇਹਨਾਂ ਤਸਕਰਾਂ ਵਿੱਚੋਂ ਇੱਕ ਅਜ਼ਾਦ ਹੁਸੈਨ ਨੂੰ ਗਲਾਸਗੋ ਦੀ ਹਾਈ ਕੋਰਟ ਵਿੱਚ ਮੁਕੱਦਮੇ ਤੋਂ ਬਾਅਦ ਦੋਸ਼ੀ ਕਰਾਰ ਦਿੱਤੇ ਜਾਣ ਉਪਰੰਤ ਚਾਰ ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ।
ਇਸ ਤੋਂ ਪਹਿਲਾਂ ਰਿਆਨ ਕਾਰਵਿਲ, ਅਦੀਲ ਇਕਬਾਲ, ਸਾਦ ਕਯੂਮ, ਅਜੈਦੀਪ ਸਿੰਘ ਅਤੇ ਮੁਹੰਮਦ ਹਨੀਫ ਨੂੰ ਵੀ ਦੋਸ਼ੀ ਕਰਾਰ ਦੇ ਕੇ ਵੱਖ-ਵੱਖ ਸੁਣਵਾਈਆਂ ਦੌਰਾਨ ਸਜ਼ਾਵਾਂ ਸੁਣਾਈਆਂ ਜਾ ਚੁੱਕੀਆਂ ਹਨ।
ਇਹ ਗਿਰੋਹ ਗਲਾਸਗੋ ਵਿੱਚ ਕੋਕੀਨ, ਐਕਸਟਸੀ, ਐਟੀਜ਼ੋਲਮ ਅਤੇ ਕੇਟਾਮਾਈਨ ਵਰਗੇ ਨਸ਼ੀਲੇ ਪਦਾਰਥਾਂ ਦੀ ਸਪਲਾਈ ਕਰਕੇ ਹੋਣ ਵਾਲੀ ਕਮਾਈ ਦਾ ਸੋਸ਼ਲ ਮੀਡੀਆ 'ਤੇ ਫੁਕਰੀ ਮਾਰਦੇ ਸਨ।
ਨਸ਼ਿਆਂ ਦੀ ਤਸਕਰੀ ਤੋਂ ਕਮਾਏ ਸੈਂਕੜੇ ਹਜ਼ਾਰ ਪੌਂਡ ਉਨ੍ਹਾਂ ਨੇ ਮਹਿੰਗੀਆਂ ਲਗਜ਼ਰੀ ਕਾਰਾਂ ਖਰੀਦਣ 'ਤੇ ਖਰਚ ਕੀਤੇ, ਜਿਨ੍ਹਾਂ ਵਿੱਚ ਮੈਕਲਾਰੇਨ ਵਰਗੀ ਸੁਪਰਕਾਰ ਵੀ ਸ਼ਾਮਲ ਸੀ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਆਪਣੀ ਗੈਰ-ਕਾਨੂੰਨੀ ਕਮਾਈ ਨਾਲ ਮਹਿੰਗੀਆਂ ਘੜੀਆਂ, ਗਹਿਣੇ ਅਤੇ ਸੰਯੁਕਤ ਅਰਬ ਅਮੀਰਾਤ (UAE) ਵਿੱਚ ਆਲੀਸ਼ਾਨ ਰਿਹਾਇਸ਼ਾਂ 'ਤੇ ਵੀ ਖਰਚ ਕੀਤਾ।
ਇਸ ਗਿਰੋਹ ਦੀਆਂ ਗੈਰ-ਕਾਨੂੰਨੀ ਸਰਗਰਮੀਆਂ ਦਾ ਪਰਦਾਫਾਸ਼ ਸਾਲ 2022 ਦੇ ਸ਼ੁਰੂ ਵਿੱਚ 'ਆਪ੍ਰੇਸ਼ਨ ਅਰੈਕਨੋਇਡ' ਤਹਿਤ ਹੋਇਆ ਸੀ। ਇਸ ਮਾਮਲੇ ਦੀ ਜਾਂਚ ਗ੍ਰੇਟਰ ਗਲਾਸਗੋ ਦੇ ਜਾਸੂਸ ਪੁਲਿਸ ਅਧਿਕਾਰੀਆਂ ਦੀ ਇੱਕ ਵਿਸ਼ੇਸ਼ ਟੀਮ ਵੱਲੋਂ ਕੀਤੀ ਗਈ ਸੀ।